Нууцаас гарч нийтэд ил болж буй Засгийн газрын 32-р тэмдэглэлийн зарим хэсгийг ил болгов

ЗГХЭГ-ын дарга Л.Оюун-Эрдэнэ "Эрдэнэт Үйлдвэр"-ийн 49 хувийг худалдаж авахтай холбоотой зарим нууц материалыг ил болгохоо мэдэгдсэн. Ингэхдээ ЭҮ-ийн 49 хувийг зарахтай холбоотой Засгийн газрын анхны хуралдааны нууц гэх 32-р тэмдэглэлийг нээлттэй болгох гэж байна.

Тухайн протокол нь Төрийн нууцын хуулиар нууц дардас дарсан байсныг нууцаас гаргасан юм. Төрийн нууц материалыг хэн бугай нь ч ярьж, ил гаргаж болдоггүй. Эс бөгөөс 8 жилийн ялтай. Тиймээс хууль, хяналтынхан ярьж хэлэлцэж болох материал ил болж байгаа нь энэ аж.

Тус  протокол нь 2016 оны 6-р сарын 9-ний өдрийн хурал юм байна. Энэ нь Ч.Сайханбилэгийн ЗГ хойд хөршөөс ЭҮ-ийн 49 хувийг худалдаж авах давуу эрхээсээ татгалзаж, дөнгөж байгуулагдсан үйл ажиллагаагүй "Монголын зэс корпораци"-д худалдах тухай нууц горимоор хуралдсан хуралдаан байжээ.

Өмнө нь Засгийн газар 2016 оны 6-р сарын 16 өдрийн буюу хоёр дахь нууц хуралдааны протоколыг ил болгосон байсан юм. ЗГ-ын энэ удаа ил болгосон нууц протокол нь Худалдаа Хөгжлийн банк, Монголын зэс корпораци хоёр удирдлага санхүүгийн хувьд нэг гэдэг нь нотлогдож байгаа ажээ.

 Энэ тэмдэглэлийг бүрэн эхээр нь Даваа гарагт олон нийтэд танилцуулах хүлээлт байна.

ЭХ СУРВАЛЖ: IKON.MN, С.БАДРАЛ,