”Мартагдсан” Байгалийн түүхийн музейг хэзээ шинэчлэх нь тодорхойгүй байна

Байгалийн түүхийн музейн байшин ашиглалтын шаардлага хангахгүй болж, үүдээ хаагаад зургаан жилийн нүүр үзжээ. Өнөөдрийг хүртэл шийдлээ олоогүй энэ асуудлыг судалж буй талаараа БСШУС-ын сайд Ё.Баатарбилэг мэдээлэл өглөө. 

 

Тэрбээр “Салбарын сайдын хувьд би үндэсний хэмжээний, байгаль, түүхээ бүгдийг нь нэг дороос үзээд гардаг томоохон музейтэй болъё гэж бодож байгаа. Хотын төв байгаа шаардлага хангахаа больсон музейнүүдээ төрийн өмчийн газар руу шилжүүлээд дуудлага худалдаанд оруулж, олсон санхүүжилтээрээ шинэ музейн бүтээн байгуулалтыг санхүүжүүлэх боломжийг бид судалж байна. Манайд музейн мэргэжлийн зураг хийдэг хүн байдаггүй. Социализмын үед барьсан музейн зургуудыг ОХУ-ын архитекторуудын тусламжтайгаар барьсан. 1990 оноос хойш манай улсад шинээр музей, театр бариагүй. Тиймээс энэ жил музей, театрын зургийг бэлэн болгохоор ажиллаж байна" гэсэн мэдээллийг өглөө.