Цагаан ордны гацуур модыг ирэх даваа гарагт авчирна

АНУ-ын Ерөнхийлөгчийн Цагаан ордонд засах зул сарын баярын гацуур модыг тэргүүн хатагтай Мелания Трамп ирэх даваа гарагийн үдэд хүлээн авахаар болжээ. 

Пенсильвания муж улсын “Mahantongo Valley” фермээс авчрах уг гацуур мод нь Үндэсний гацуур модны холбооноос жил тутам зохион байгуулдаг тэмцээнд түрүүлж, Цагаан ордныг чимэх эрхээ авсан байна. Цагаан ордноос мягмар гарагт гаргасан мэдэгдэлд гацуурын талаар дэлгэрэнгүй мэдээлээгүй боловч уг модыг морин тэргээр Цагаан ордны урд хаалганы өмнө авчирч, хөх өрөөнд засах ажээ.