АН-ын дэнчингийн 400 сая төгрөгийг банкууд санхүүжүүлээд байгаа юм биш биз

УИХ-ын ээлжит сонгууль хаяанд ирлээ. Улс эх орноо цэцэглүүлэн хөгжүүлж, улс шиг улс болгох чин хүсэлдээ “хөтлөгдсөн” улстөрчид  хөдөлгөөнд орж эхэллээ. УИХ-д сонгогдож, улсаа хөгжүүлэхийн төлөө хэн хүнгүй л уулыг нурааж, усыг эргүүлэхэд бэлэн болжээ.  

Өнгөрөгч долоо хоногт “Хера холдинг” группийн ерөнхийлөгч Х.Ганхуяг өөрт нь бор дугтуйтай захидал үл таних хүнээс ирснийг зарлаж, уг баримтад АН-д 181 хүн 100 сая төгрөгийн дэнчингээ тушаасан тухай цагаан дээр хараар бичээстэй байна гэж мэдэгдсэн.

Түүний араас нэг бус горьлогч 100 сая төгрөгөө АН-д тушаагаад байгаагаа өөрсдөө тайлбарлаж, удахгүй хоёрдугаар шатны 300 сая төгрөгөө тушаана гэж сайрхаж буй харагдана. Гэхдээ Х.Ганхуягийн ил болгосон нэрсийн жагсаалтыг нухацтай харвал горьлогчид яг ч өөрсдийнхөө халааснаас 100, 300 сая төгрөг гаргаж, АН-д тушаагаад байгаа биш бололтой.

Тодруулбал, Өсөх наснаасаа л намын тогоо өнгийж, өдий хүртэл улс төрөөс салаагүй яваа, өдгөө улс төрд нэр нүүрээ барж дууссан гэж болохоор улстөрчид нь ураг төрөл, зөвлөх туслах гээд өөрийн итгэлт хүмүүсээ улс төрд шургуулахаар дэнчингийн гэх 100, 300 сая төгрөгийг гаргасан байж болзошгүйг эх сурвалжууд онцолж байна.

Нөгөө талаас Хаан банк, Худалдаа хөгжлийн банк, Голомт банк тэргүүтэй банкууд  өөрсдөө уяа засчихаад хэдэн “морь” сойгоод, санхүүжүүлээд  эхэлсэн гэх мэдээлэл ч гарч байна. Тэд бол дэнчингийн хэдэн зуун саяыг АТМ-нуудынхаа шимтгэлээс л гаргаад өгчихнө. Гол нь улс төрд өөрсдийн гар хөлөө оруулчихвал одоо тушааж буй дэнчингээ хэдэн зуу дахин нугалж олох боломж бүрдэхийг тэд юу эс андах.

Гэхдээ энэ сонгуулиар сонгогчид ухаантай байх хэрэгтэй. Улсаа хөгжүүлэхдээ ургаа хад шиг, ууж идэхдээ уургын морь шиг нөхдийг бид бишгүйдээ л сонголоо. Одоо дор бүрнээ хариуцлагатай, ухаантай байх цаг. Тэгж чадвал нууц ноёдууд хэчнээн дэнчингийн мөнгө гаргаад ч нэмэргүй билээ.

Үндэсний шуудан