Далд уурхайн 1.45 тэрбум долларын хэтэрсэн зардал монгол ажилтнуудад холбоотой болох баримтаа дэлгэхийг шаардлаа

Оюу толгой ХХК-ийн уул, уурхайн ажилтны үйлдвэрчний эвлэлийн хорооноос “Рио Тинто” группийн Монгол дахь үйл ажиллагаа эрхэлсэн салбарт шаардлага хүргүүлж буйгаа мэдэгдлээ.

“РИО ТИНТО” ГРУППИЙН МОНГОЛ ДАХЬ ҮЙЛ АЖИЛЛАГАА ЭРХЭЛСЭН ЗАХИРАЛ Х.АМАРЖАРГАЛ ТАНАА

Шаардлага хүргүүлэх тухай

“Рио Тинто” групп сүүлийн өдрүүдэд Оюу толгой зэс, алтны ордын Далд уурхайн төсөлд хяналт тавьж ажилласан хөндлөнгийн шинжээчдийн дүгнэлттэй санал нийлэхгүй байгаагаа  mining.com,

financialtimes.com зэрэг дэлхийн томоохон хэвлэл мэдээллээр дамжуулан байр сууриа илэрхийллээ. Уг мэдэгдэл нь Монгол улсын Засгийн газартай эхлүүлсэн “Рио Тинто” группийн хэлэлцээртэй холбоотой гэдгийг “Оюутолгой” ХХК-д ажиллаж байгаа ажилтан ажиллагсдын зүгээс хүндэтгэн үзэж, анхааралтай ажиглаж байна. Харамсалтай нь, дээрх хэвлэл мэдээллийн хэрэгслээр гарсан нийтлэлд “Далд уурхайн бүтээн байгуулалтын зардал 1.45 тэрбум ам.доллараар хэтрэхэд нөлөөлсөн нэг хүчин зүйл нь монгол ажилтнуудад зориулсан хөрөнгө оруулалтын зардлын өсөлт байсан…

Өнөөдөр Оюутолгой компанийн нийт ажилчдын 96 хувь Монголчуудаас бүрдэж байгаа нь анх төлөвлөж байснаас өндөр үзүүлэлт бөгөөд тэдэнд оруулсан хөрөнгө оруулалт  зардлын өсөлтөд нөлөөлж, гүйцэтгэлийн хугацааг хойшлоход хүргэсэн” хэмээн тайлбарласан нь Оюутолгой компанийн бүтээн байгуулалтад гар бие оролцож буй олон мянган ажилтан, ажиллагсдын эргэлзээ бухимдлыг төрүүлсэн хариуцлагагүй, хүндэтгэлгүй, үл ойшоосон, тодорхой бус шалтаг шалтгаан эрэлхийлсэн тайлбар болсон гэдгийг албан ёсоор мэдэгдэж байна.

“Рио Тинто” группийн энэхүү тайлбар нь Оюутолгой компанийн нийт ажилтан ажиллагсдыг тус группийн явуулж буй үйл ажиллагаанд итгэх итгэлийг унагаад зогсохгүй ажиллаж хөдөлмөрлөх боломж бололцоо, нийгэмд эзлэх байр суурь, нэр хүндэд нь бүдүүлгээр халдсан хэрэг юм. Иймд Оюутолгой компанийн нийт ажилтан ажиллагсдын эрх ашиг, нэр хүнд, нийгмийн баталгаа, ажиллах орчныг хамгаалж, засч сайжруулахын төлөө ажиллах үүрэг хүлээсэн байгууллагын хувьд “Рио Тинто” группын Монгол дахь үйл ажиллагаа эрхэлсэн захирал Х.Амаржаргал Таныг дээр дурдагдсан ерөнхий мэдээлэлд тайлбар өгч, дараах асуултад дэлгэрэнгүй хариулт өгөхийг шаардаж байна. Үүнд:

Дээр дурдсан асуултын дагуу тодорхой тоо, баримт, нотолгоо бүхий хариултыг 2021 оны аравдугаар сарын 20-ны өдөр албан ёсоор Оюутолгой компанийн нийт ажилтан ажиллагсад болон олон нийтэд ил тод мэдээлэхийг шаардаж байна.